ಏನು ಜೀವನದರ್ಥ ಏನು ಪ್ರಪಂಚಾರ್ಥ ?
ಏನು ಜೀವಪ್ರಪಂಚಗಳ ಸಂಬಂದ |
ಕಾಣದಿರುವುದೆನಾನುಮುಂಟೆ ಅದೇನು|
ಜ್ಞಾನ ಪ್ರಮಾಣವೇಂ -ಮಂಕುತಿಮ್ಮ || ೪
(ಕಾಣದೆ +ಇಲ್ಲಿ +ಇರುವುದು +ಏನಾನುಂ +ಉಂಟೆ )
ಈ ನಮ್ಮ ಜೀವನಕ್ಕೆ ಏನಾದರೂ ಅರ್ಥವಿದೆಯೇ ? ಈ ಪ್ರಪಂಚಕ್ಕೆ ಏನಾದರೂ ಅರ್ಥ ಇದೆಯೇ ಈ ಜೀವಿಗಳ ಮತ್ತು ಪ್ರಪಂಚಗಳ ಸಂಬಂಧವೇನು ನಮಗೆ ಗೋಚರವಾಗದೆ ಇರುವುದು ಇಲ್ಲಿ ಏನಾದರೂ ಇದೆಯೇ ಹಾಗಿದ್ದರೆ ಏನದು ಅದು ನಮ್ಮ ಜ್ಞಾನಶಕ್ತಿಗೆ ಮೀರಿದ್ದುದೋ ಏನು .
ದೇವರೆಂಬುದದೇನು ಕಗ್ಗತ್ತಲೆಯ ಗವಿಯೆ |
ನಾವರಿಯಲಾರದೆಲ್ಲದರೊಟ್ಟು ಹೆಸರೆ ||
ಕಾವನೊರ್ವನಿರಲ್ಕೆ ಜಗದ ಕಥೆಯೇಕಿಂತು |
ಸಾವು ಹುಟ್ಟುಗಳೇನು ಮಂಕುತಿಮ್ಮ|| ೫
(ದೇವರು +ಎಂಬುದು +ಅದು +ಏನು)(ನಾವು +ಅರಿಯಲಾರದ +ಎಲ್ಲದರ +ಒಟ್ಟು )(ಕಾವಂ +ಒರ್ವನ್ +ಇರಲ್ಕೆ)(ಜಗದ +ಕಥೆ+ಏಕೆ +ಇಂತು)
ದೇವರು ಎನ್ನುವುದು ಏನು ಅದು ಒಂದು ಕಗ್ಗತ್ತಲೆಯಿಂದ ಕೂಡಿದ ಗುಹೆಯೋ ಅಥವಾ ನಮಗೆ ತಿಳಿಯದೆ ಇರುವ ಎಲ್ಲವನ್ನು ಕಾಪಾಡುವನೊಬ್ಬನಿದ್ದರೂ ಈ ಜಗತ್ತಿನ ಕಥೆ ಹೀಗೇಕಿದೆ ಈ ಹುಟ್ಟು ಮತ್ತು ಸಾವುಗಳ ಅರಿವೇನು ಈ ರೀತಿಯ ಪ್ರಶ್ನೆಗಳು ಅರ್ಥವೇನು ಈ ರೀತಿಯ ಪ್ರಶ್ನೆಗಳು ಪ್ರತಿಯೊಬ್ಬ ಮನುಷ್ಯನನ್ನೂ ಒಂದಲ್ಲ ಒಂದು ಸಲ ಕಾಡಿರುವುವಂತಹವೇ .
ಒಗಟೆಯೇನೀ ಸೃಷ್ಟಿಬಾಳಿನರ್ಥವದೇನು |
ಬಗೆದು ಬಿಡಿಸುವರಾರು ಸೋಜಿಗವನಿದನು ||
ಜಗವ ನಿರವಿಸಿದ ಕೈಯೊಂದಾದೊಡೇಕಿಂತು |
ಬಗೆ ಬಗೆಯ ಜೀವಗತಿ ಮಂಕುತಿಮ್ಮ || ೬
(ಒಗಟೆ +ಏನು +ಈ)(ಬಾಳಿನ +ಅರ್ಥವದು +ಏನು)(ಬಿಡಿಸುವರು +ಆರು )(ಸೋಜಿಗವನು+ಇದನು)(ಕೈ+ಒಂದು +ಆದೊಡೆ +ಏಕೆ +ಇಂತು)
ಈ ಸೃಷ್ಟಿ ಎನ್ನುವುದು ಕಗ್ಗಂಟೋ ಏನು ಈ ಬಾಳಿನ ಏನಾದರೂ ಅರ್ಥವಿದೆಯೇ ಈ ಆಶ್ಚರ್ಯಕರವಾದ ಕಗ್ಗಂಟನ್ನು ಯೋಚಿಸಿ ಯಾರು ಬಿಡಿಸಬಲ್ಲರು ಈ ಜಗತ್ತನ್ನು ಒಂದು ಕಾಣದ ಕೈ ನಿರ್ಮಿಸಿದೆ (ನಿರವಿಸಿದ)ಎಂದರೆ ಈ ವಿಧ ವಿಧವಾದ ಜೀವಗತಿಗಳು ಏಕೆ ?
ಬದುಕಿಗಾರ್ ನಾಯಕರು ಏಕನೊ ಅನೇಕರೋ |
ವಿಧಿಯೊ ಪೌರುಷವೊ ಧರುಮವೊ ಅಂಧಬಲವೋ ||
ಕುದುರುವುದದೆಂತು ಈ ಯವ್ಯವಸ್ಥೆಯ ಪಾಡು ?
ಆದಿಗುದಿಯೆ ಗತಿಯೇನೊ ಮಂಕುತಿಮ್ಮ | ೭
(ಬದುಕಿಗೆ+ಆರ್)(ಕುದುರುವುದು+ಅದು+ಎಂತು)(ಈ+ಅವ್ಯವಸ್ಥೆಯ)
ಈ ಬದುಕಿಗೆ ನಾಯಕರು ಯಾರು ಒಬ್ಬನೇ ಒಬ್ಬನೋ ಅಥವಾ ಬಹು ಮಂದಿ ಇದ್ದಾರೆಯೋ ವಿಧಿಯೋ ಪುರುಷ ಪ್ರಯತ್ನವೋ ಧರ್ಮದ ಶಕ್ತಿಯೋ ಅಥವಾ ಒಂದು ಅಂಧ ಬಲವೋ ಈ ಅವ್ಯವಸ್ಥೆಯ ಪಾಡು ಸರಿಯಾಗುವುದು (ಕುದುರುವುದು )ಹೇಗೆ ಇಲ್ಲ ಈ ತಳಮಳದಲ್ಲಿಯೇ (ಆದಿಗುದಿ)ನಾವು ಯಾವಾಗಲೂ ಇರಬೇಕೆ?
ಕ್ರಮವೊಂದು ಲಕ್ಷ್ಯವೊಂದುಂಟೇನು ಸೃಷ್ಟಿಯಲಿ|
ಭ್ರಮಿಪುದೇನಾಗಾಗ ಕರ್ತೃವಿನ ಮನಸು ||
ಮಮತೆಯುಳ್ಳವನಾತನಾದೊಡೀ ಜೀವಗಳು |
ಶ್ರಮಪಡುವುವೇಕಿಂತು ಮಂಕುತಿಮ್ಮ|| ೮
(ಲಕ್ಷ್ಯ+ಒಂದು +ಉಂಟೇನು )(ಭ್ರಮಿಪುದು +ಏನು+ಆಗಾಗ )(ಮಮತೆ+ಉಳ್ಳವನು+ಆತನು+ಆದೊಡೆ+ಈ)(ಶ್ರಮಪಡುವುವು+ಏಕೆ+ಇಂತು)
ಈ ಭಗವಂತನ ಸೃಷ್ಟಿಯಲ್ಲಿ ಒಂದು ಕ್ರಮ ಮತ್ತು ಗುರಿ ಏನಾದರೂ ಉಂಟೆ ಈ ಸೃಷ್ಟಿಕರ್ತನ ಮನಸ್ಸು ಆಗಾಗ ತಪ್ಪಾಗಿ ಭಾವಿಸುತ್ತದೆಯೇನು ಮಮತೆಯುಳ್ಳವನಾದರೆ ಈ ಜೀವಿಗಳು ಏತಕ್ಕಾಗಿ ಈ ರೀತಿ ಶ್ರಮ ಪಡುತ್ತಿವೆ ?
